الرجل تـدب

سبحـان الله على ده شعـب

من اللي شوفته منه جالي ورم في القـلب

جالي صداع في النافوخ
كأني وقـعتـلي في حفرة أو كلت مطب

شعب مش معروف عنه هو فرحان  ولا..

زعلان ولا .. مخنوق ولا .. مزنوق ولا..

جعان ولا .. الرجل بـتـدب مترح ما تـحـب

النهاردة تلاقيـه بـيـلعـن العيـشة

و المواصلات و العيـش و الشيـشة

و الأكل و الشـرب نايم على الحـشيـشة

وبعد كاس الأمم كله إتـنـسى

ماهي الرجل تـدب مترح ما تـحـب

شعب زعلان من نفسه و زعلان على حاله

و على كرامته اللي موجوعة

و على فلوسه اللي مسروقـة

و أرضه اللي محروقة

و عند أول فرصة كله بيكون ليه في النهب

لأن الرجل تدب مترح ما تحب

شعب فكاهي .. عايـش خـرافي

تاريخه قصاده .. ماضيـه هو لسانه

لكن .. لا في مستـقبـل
و الغريب إنه الكل بـيـقبـل

و فرحان بحضارة و أعظم فنارة
و إنتخابات مجالس

ده رمز الفرخة و ده رمز الكلب

فالحيـن تريـقة
على ده و ده و ده و ده

فاكرينهم بـيـحوبنا و ده طبعاً لأ

معقول حد يـحب حد كلامه مـدب

أصل الرجل تدب مترح ما تحب

في كل حاجة نهـيـبة

في العمرة و الحج

و البـنى و الرصف

و المجاري و المية و الحـل و الربـط

علشان إحنا عباقرة

رجلنا بتدب مترح ما تحب

بقلم م / مصطفى الطبجي