· مصر دولة مصدرة و محدش يقدر ينكر الكلام ده لا من الحكومة و لا من المعارضة و لا من المواطن البسيط اللي ملوش في السياسة , بس السؤال هنا بقى هي مصر دولة مصدرة لإيه بالظبط ؟ , أنهي سلعة دي اللي مصر متصدرة فيها و كل بلاد العالم بتتهافت عليها ... من الأخر كده مصر دولة مصدرة للشباب , سيبك بقى من اللي يقولك شباب مين يا عم هما بقوا فيهم صحة و لا اللي يقولك الشباب شباب القلب و الكلام الفاضي ده , أنا و إنت و الكل عارف إن أحسن شباب في العالم هما الشباب المصري , كل اللي ناقصهم بس فرصة يثـبـتـوا فيها إنهم رجالة جدعان يعدوا البحر و لا يتـبـلوش يشربوا المحيط و لا يسكروش , و عشان كده كله بيـجري على برة يدور على الفرصة دي لأنه شاف بعينه الخبيرة إن الفرص هنا مش بتـيـجي إلا للي عنده واسطة أو اللي عنده فلوس , إنما الغلبان اللي مش لاقي تمن رغيف العيش هيكون في خبر كان , مش مهم بقى الشاب المكافح ده هيخرج برة مصر إزاي , عقد عمل في أي دولة عربية بأي مرتب ماشي , هربان على مركب صيد لأي دولة أوروبية ماشي , يضرب فيزا سياحة و بعدها يستخبى جوة البلد 10 سنين لحد ما ياخد الجنسية و الإقامة ماشي , يغسل صحون برة ماشي , أو يكون عبقري في تخصص نادر فيتكرم من دولة تانية و ياخد الجنسية و يتمنع من رجوع مصر نهائي ده برضه ماشي , كل اللي فات ده ماشي و بيحصل كل يوم و برضه محدش يقدر ينكره لا من حكومة و لا من معارضة , كل اللي فات ده و أمثلة غيرهم كتير لشباب مصر صدرتهم لدول العالم بسعر التراب و الله جايز يكون التراب بقى أغلى شوية , و المفروض إن سعر الشباب دول غالي قوي و بيندفع فيهم كتير قوي بس للأسف و كالعادة رخصوا زي التراب و باروا زي الأرض و بقوا ببلاش زي سعر دقيقة المحمول , عشان كده بقى طبيعي قوي إنك تلاقي مهندس مصري مقتول و متقطع في بلد إفريقية , أو تلاقي شاب مقتول و مدبوح في بلد أوروبية , أو تلاقي شاب متعلق على العمدان في بلد عربية , أو ..... أو ..... أو ..... و عمار يا مصر.
· مصر دولة مؤثرة في منطقة الشرق الأوسط حتى على بعض الدول الغير عربية , و إن كان الموضوع ده كان فيه شك بسبب المواقف و التصريحات و الإعتداءات على الجنود اللي على الحدود المصرية بس في الآخر و الحمد لله ظهرت الحقيقة اللي تشرف كل مصري و ترفع راسه و هو ماشي وسط الخلق في بلاد الله , دلوقتي مش بس هيعتمد على تاريخ قديم ومشرف عشان يفتخر ببلده و يقول إحنا طردنا الهكسوس و هزمنا التتار و حاربنا الصلبيين و عدينا القناة , خلاص جملة الفعل الماضي إنتهت و بقى دلوقتي يقدر يتكلم بصيغة الفعل المضارع , دلوقتي هيقدر يقول بلدنا - اللي هي مصر - بتأثر تأثير قوي جدا , بلدنا - اللي هي مصر - قرارتها الحاسمة حتى لو كانت قرارات داخلية بتسبب بلبلة لبعض الدولة التانية , و عشان ماطولش عليكم هاديكم مثال بسيط جدا , لما قامت وزارة الداخلية - يجعل كلامنا خفيف عليهم - بعمل حملات مكثفة ضد تجار الحشيش و نجحوا رجال الأمن إنهم يصادروا أطنان من الحشيش لدرجة إن الحشيش بقى شاحح جدا في السوق و زي ما قال كتير من الناس إن بقى في أزمة حشيش و المشكلة إن الأزمة دي كانت في وقت حرج , كانت قبل شم النسيم , يعني الموسم بتاعه , بس طبعا كده أحسن بكتير خلي الناس تفوق من الإدمان ده و كل الشكر لوزير الداخلية و رجاله الشجعان , الغريب بقى إن نجاح الحملات دي أثر بشكل كبير قوي في إسرائيل , إزاي ؟؟ , على حسب كلام صحيفة يديعوت أحرونوت الإسرائيلية بخصوص الأزمة والمظاهرة التى نظمها مئات من الحشاشين الإسرائيليين فى ساحة "إسحاق رابين" بوسط مدينة تل أبيب للمطالبة بحرية شرب الحشيش ،(( إن هناك صعوبة فعليه يعانى على إثرها أوساط المدخنين لنبات "الماريجوانا" و"الحشيش" و"القنب" فى إسرائيل، وذلك بسبب النشاط المكثف الذى يقوم به جيراننا "المصريون" بالقضاء عليه - طبقا لوصفها - حيث إن الجهود المكثفة التى قامت بها السلطات المصرية فى الفترة الأخيرة بمنع دخول المخدرات من إفريقيا والسودان لأراضى المصرية، ومن ثم تهريبها لإسرائيل عبر الحدود، كان له الأثر الكبير فى اختفائه بالأسواق الإسرائيلية )) , حقيقي حاجة تفرح , يعني مجرد إن مصر قررت إنها تمنع دخول الحشيش ده أثر على كل الدول المحيطة و عملها مشاكل داخلية ..... و عمار يا مصر .
· مين بقى اللي عندهم 11 سنة دول ؟؟ و عملوا إيه بالظيط ؟؟ حادثة بسيطة تقريبا مجتش في صحيفة قومية أو معارضة أو خاصة أو صفراء , الحكاية إنه 5 عيال في سنة خامسة إبتدائي - عندهم 11 سنة - خطفوا بنت في رابعة إبتدائي بعد الإمتحان و خدوها على حمام عمومي و قطعوا هدموها و إعتدوا عليها و لما أهلها عرفوا بلغوا الشرطة و البنت إتعرفت على العيال و راحوا على الأحداث , بس أهل البنت مش ساكتين و حالفين ليقتلوا العيال دي , كل ده مش موضوعنا , السؤال اللي جاه في دماغي لما سمعت حدوتة العيال دول , إن شوية عيال في خامسة إبتدائي جالهم تفكير إزاي إنهم يخطفوا بنت ؟؟ إيه المخ الإجرامي اللي عندهم ده ؟؟ ايه القلب الميت اللي في صدرهم ده ؟؟ صحيح إنهم إنكشفوا و من تاني يوم بس ده كانت نتيجة لقلة الخبرة , يعني لو إديناهم فرصة يطوروا من نفسهم هيبقوا كارثة من كوارث الزمن , و أنا متأكد إن في زيهم كتير للظروف المعيشية الصعبة بقوا كارثة من كوارث الزمان و كل زمان , السؤال بقى , لو الحكومة جمعت كل الكوارث دول اللي ماليين البلد و شحنتهم على كام دولة إفريقية كده عاملين قلق و بلبلة و صوتهم بقى عالي بعد ما كانوا ماشيين جنب الحيط ؟؟ يا ترى هتكون إيه النتيجة ؟؟ النتيجة الأساسية و المتوقعة إن محافظات مصر هيزيدوا من 29 محافظة ال 33 محافظة .... و عمار يا مصر .
ليست هناك تعليقات:
إرسال تعليق