و بعدها معاك يا مصر، خنقانا و كتمانا
يا غنية، يا غبية ليه في المشاكل غرقانة
لا عاد فيك زراعة و لا صناعة و الإسم محروسة
لا عاد فيك تجارة و لا سياحة حالتك بجد تعبانة
نيلك معتش نيلك طول ما إنت محتاسة
و الفقر مالي عينك و سايق في الغلاسة
فاكرة شعبك بيضحك مع إن القلوب موجوعة
إزاي بقيت في لحظة للفرحة كنـّاسة
معتش فيك يا مصر خلاص حاجة مصنوعة
كله من الصين و يا ريتها بضاعة مبلوعة
اللي إتغش و اللي إتسرطن و اللي كان قطران
و اللي حبك يلهف منك و سابك مخدوعة
بعد ما كنت وسط الدول رمز و كيان
بعد ما كنت وسط العرب رمز الأمان
مين خلاك تحت؟ مين السبب مين؟
مين خلاك متهانة و في عزبة من الحرمان
مين اللي مش شايف شعبك إنهم بني آدمين
عاوزين بس ياكلوا و يشربوا و راضيين
و يا سلام لو هدمة جديدة لو حتى بالإيحار
بس العيال تفرح و يناموا ضحكانيـن
مش كل شعبك من اللي بياكلوا الكفيار
و الصيف في مارينا و العشا منبار
كتير مش لاقيين ياكلوا يشكوا و محدش يسمع
فطار مفيش غدا مفيش و العشا صباع خيار
إزاي فيك السد و كل شوية الكهرباء تقطع
إزاي فيك الخير و الجوع لساه بيلسع
ولادك بيـهجروا بيـهربـوا كارهينك
بعد ما قالوا الآه دي عصاية المخبر بتوجع
ليه مش حباهم و لاّ هما اللي مش فاهمينك
و لا إنت اللي مش فاهمة و مش عاوزة حد يجيلك
إفهمي يا اللي مفيش زيك في الدنيا
عمر ما كان العساكر هما اللي نافعينك
يا اللي إسمك بيـتـقال و لا الغنوة
يا اللي صوتك عذب و لا النسمة
يا اللي في القلب عايشة يا بلح أمهات
بلاش تبيعي ولادك خلي عندك نخوة
بقلم / مصطفى الطـبـجي
ليست هناك تعليقات:
إرسال تعليق