أنا مش آسف يا ريس
حتى لو في الآخر... طلعت كويس
بس كويس على إيه؟؟
كويس بأمارة إيه؟؟؟
تلاتين سنة... خَـدنا من وشك إيه؟؟
غير فقر و ذل و مهانة
ناس في القصور و ناس تانية غلبانة
أكلك من فرنسا و أطفال ماتت جعانة
إنت كويس على إيه؟؟
و الشباب مش لاقي نفسه... في بطالة
فرد أمن يا عيني مرتبه حالته حالة
شايف بعينه حبايبك بيصرفوا... بغباوة
و في الآخر تضحك عليه يا ولداه بحتة علاوة
و عاوزه كمان يحبك و يصقف و يهتف ليك
هما 100 جنيه في الشهر هيجـيبوا حق الفريك؟؟؟
إنت كويس على إيه؟؟
الناس اللي حوليك أكلوا دماغك و دماغنا
فهموك إن مصر كانت لينا جنة
مع إننا كنا في كل متر... بنلاقي لجنة
فهموك إنهم ضحّـوا بوقتهم علشان بلدنا
يعني مش علشان فلوسك
و سطوتك و نفوذك
و أسرتك و جبروتك
شعبك كان بيموت و جنابك في شرم الشيخ
و كل ما يجي وزير عِـدل تقولوا عليه بطيخ
يبقى إنت كويس على إيه؟؟
الفساد في عهدك على كل لون يا باتيستا
و كانوا يسألوا الحرامي خلصت سرقة؟؟
يقولك... لأ لسة!!!
طيب ده في شرع مين
نعيش من خير بلدنا محرومين
نغيش فيها غلابة
و الغـُرب هما اللي بيها متمتعين
و معاهم رجال أعمال و رجال الحزب
و رجال فك الأعمال و بتوع الكذب
إنت كويس على إيه؟؟؟
على الفلوس اللي سارقيها
و لا الأرض اللي ناهبها
و لا الشرطة اللي قتلت في أولادها
إحنا مش آسفين يا ريـس
و النعمة إنت مكنتش كويس
بقلم م / مصطفى الطبجي
ليست هناك تعليقات:
إرسال تعليق