حمد لله على سلامتـك يا اللي كنت غايـبـة
حمد لله على سلامتـك
يا اللي قلوبـنـا... فيك دايـبة
كنت مطـوّلة البعاد... قلنـا مش راجعة
أتابـيـك كنت مخطوفة و بـتـنـادي
و إحنا اللي كنا ودن من عجيـن و ودن مش سامعة
أتابـيـك كنت مجروحة زيـّنـا و أكتـر بس صابرة
على السرقة و الفساد و ظلم الجبابرة
حمد لله على سلامتك يا اللي ياما دوخـتـيـنـا
يا اللي نـيـلك بـيـجـري بدل الدم فيـنـا
و زي ما إحنا عطاشا
طلعت إنت كمان عطشانة ليـنـا
مش هنلومك على اللي فات و لا على اللي راح
و لا هنـفتـح في القديم و نزود الجراح
بس و رحمة الشهداء اللي ماتوا على أرضك
لا هنـسيـب حـقك و لا نفرط في عرضك
حمد لله على سلامتك يا مصر يا غالية
يا أم الدنيا يا ضحكة يا عالية
تاريخك و زمنك هيرجعوا من تاني
و اللي كان غيران و شمتان فيك
هيرجع لجحره... يخافك من تاني
كل اللي في يوم قل أدبه عليك و لبخ في الكلام
دلوقتي هيلم نفسه بعد ثورة الكرام
حمد لله على سلامتك يا أحلى بلاد المغرب و المشرق
يالا بقى عاوزين الشمس فيك تشرق
عشنا سنين كتير في ظلمة القمر مكنش فيها بدر
خايفيـيـن من بعض
مش خايفيـيـن على بعض
زي ما يكون الكل حاسس بغدر
بقلم م / مصطفى الطبجي
ليست هناك تعليقات:
إرسال تعليق