هتفضل باقي

مين اللي خانك يا وطن و مين اللي باع

مين اللي وقت الشدة

هرب ... و الإسم شجاع

مين اللي وهب ترابك للي مايستاهلش

مين اللي لوى دراعك

و كتم صوتك خلاك ماتصرخش

مين اللي نهب خيرك

و دبح طيرك

كأنه بيحكم حد غيرك

رغم كل المحن

هتفضل باقي يا وطن

إعذرني لو كنت في يوم جبان

لما خفت على نفسي

إعذرني لما خاني شعوري بالأمان

و الرعب كان هو إسمي

فضلت أكتب أغاني و أشعار

في حب البلد

و غيري رمى نفسه في قلب النار

مع إن برضه كان عنده ولد

مهما جار عليك الزمن

هتفضل باقي يا وطن

قالوا عليهم شباب ملهمش فيها

عقولهم فاضية و الصيف في مارينا

طلعوا شباب قلوبهم حب البلد ماليها

شباب رجالة... هما أحسن ما فينا

شباب جابوا عليها واطيها
لما شافوا و عرفوا و إتأكدوا
إن حاميها... هو حراميها

منهم اللي عاش و منهم اللي مات

و الكل عمال  يناضل

مين قال إن الشهداء أموات

عايشين فينا

 طول ما الخير جوانا فاضل

هما دول ولادك يا وطن و دول جنودك

اللي ضحوا بحياتهم علشان خلودك

و برضه رغم المحن

هتفضل باقي يا وطن

بقلم م / مصطفى الطبـجي